អ៊ុយក្រែន៖ ប្រធានាធិបតីអ៊ុយក្រែនលោក Volodymyr Zelenskyy និងមន្ត្រីយោធារបស់លោកបានអះអាងថា កងកម្លាំងរបស់អ៊ុយក្រែនបានបាញ់ទម្លាក់យន្តហោះទម្លាក់គ្រាប់បែករុស្ស៊ី Su-34 ចំនួនបីគ្រឿងកាលពីថ្ងៃសុក្រម្សិលមិញនេះនៅសមរភូមិជួរមុខភាគខាងត្បូង ដោយលោកបានលើកឡើងថាសាទរថានេះគឺជាភាពជោគជ័យដ៏ធំមួយនៅក្នុងសង្គ្រាមដែលបានអូសបន្លាយពេលអស់ ២២ខែមកហើយ។
ដោយឡែក យោធារុស្សីពុំមានការអធិប្បាយណាមួយជុំវិញការអះអាងរបស់ក្រុមយោធាអ៊ុយក្រែនខាងលើឡើយ ក៏ប៉ុន្តែអ្នកតាមដានព័ត៌មាន និងសរសេរប្លុក (Blog) របស់រុស្សីបានទទួលស្គាល់នូវការខូចខាតនេះ ហើយអ្នកវិភាគយល់ឃើញថា ការខូចខាតយន្តហោះទម្លាក់គ្រាប់បែករបស់រុស្ស៊ីទំនងជាកើតឡើងដោយការប្រើប្រាស់មីស៊ីល Patriot ដែលផ្គត់ផ្គង់ដោយសហរដ្ឋអាមេរិក។
មេបញ្ជាការកងទ័ពជើងអាកាសរបស់អ៊ុយក្រែន លោក Mykola Oleshchuk បានសរសេរនៅលើបណ្ដាញសង្គម Telegram ផ្ទាល់ខ្លួនថា "ពេលថ្ងៃត្រង់ថ្ងៃនេះ នៅតំបន់ផ្នែកខាងត្បូង បានដកចេញយន្តហោះចម្បាំងរុស្ស៊ី Su-34 ចំនួនបីគ្រឿង"។ ដោយឡែក អ្នកនាំពាក្យកងទ័ពអាកាស លោក Yuri Ihnat បានហៅភាពជោគជ័យនេះថាជា "ប្រតិបត្តិការដែលបានគ្រោងទុកដ៏អស្ចារ្យ" ។ លោក Yuri ថ្លែងផងដែរថា យន្តហោះម៉ូដែលនេះគឺជាយន្តហោះទំនើបបំផុតមួយរបស់រុស្ស៊ីសម្រាប់ការទម្លាក់គ្រាប់បែក និងការប្រតិបត្តិការវាយលុកផ្សេងៗ។
នៅក្នុងវីដេអូមួយ លោក Zelenskyy បានថ្លែងកោតសរសើរទៅកាន់អង្គភាពប្រឆាំងយន្តហោះចម្បាំងក្នុងតំបន់ Odesa សម្រាប់ការបាញ់ទម្លាក់យន្តហោះនៅក្នុងតំបន់ Kherson។ តំបន់ Kherson ត្រូវបានកាន់កាប់តាំងពីថ្ងៃដំបូងនៃការលុកលុយនាខែកុម្ភៈ ឆ្នាំ២០២២ របស់កងទ័ពរុស្សី។ កងកម្លាំងអ៊ុយក្រែនបានព្យាយាមដណ្តើមយកទឹកដីនេះមកវិញ ហើយកាលពីខែវិច្ឆិកា អ៊ុយក្រែនបានបង្កើតទីតាំងឈរជើងរបស់ខ្លួននៅច្រាំងខាងកើតនៃទន្លេ Dnipro ក្នុងទីក្រុង Kherson។
Eurasia Daily ដែលជាទស្សនាវដ្តីដែលមានមូលដ្ឋាននៅប្រទេសរុស្ស៊ីបានចុះផ្សាយថា ព័ត៌មានដែលបានចុះផ្សាយនេះគឺជាប្រភពដែលអាចទុកចិត្តបាន។ ទីក្រុង Kyiv អាចបាញ់មីស៊ីល Patriot ដែលមានរយៈចម្ងាយរហូតដល់ ១៦០គីឡូម៉ែត្រ ប្រឆាំងនឹងគោលដៅដែលមានកម្ពស់ខ្ពស់ ពីផ្នែកខាងលិចនៃទន្លេ Dnipro។ អ្នកជំនាញអាកាសចរណ៍អ៊ុយក្រែនលោក Valeriy Romanenko បានប្រាប់វិទ្យុ NV របស់អ៊ុយក្រែនថា លោកជឿថា មីស៊ីល Patriot ទំនងពិតជាបានទម្លាក់យន្តហោះរុស្ស៊ីប្រាកដមែន៕
